Жастарға сенім артамыз

«Заман өзгерді, адам да өзгерді, олардың қазіргі жағдайға көз­қарас­тары басқаша» деп жатады кей­де жай екеуара әңгіме арасында. Шын мәнінде олай емес, көбінесе біз қай мәселеге де үстіртін қарайтын сияқ­тымыз, байыбына бара бер­мейміз. Жас ұрпақ тәрбиесінде де солай, неге біз олардың кінә-кем­шіліктерін тізбелейміз де, жақсы жағына мән бере қоймаймыз? Жұ­мысымызда да басты нәрселерге мән бермейміз де, кейде болмайтын затты тіпті ай­рықша әспеттеп жібереміз.

«Жол активтерінің ұлттық сапа орталығы» шаруашылық жүргізу құқығындағы Республикалық мемлекеттік кәсіпорны – РМК (бұдан әрі – Орталық) 2019 жылы Үкімет қаулысымен құрылып, заңды тұлға ретінде жұмыс істеп жатыр. Біздің қызметіміздің мақсаты – жолдарды салу, қайта құру, жөндеу және күтіп-ұстау, сондай-ақ материалдардың сапасын сараптау. Егер бұрын аймақтық зертханалар республикалық жолдардың сапасын тексеріп, оның кемшіліктерімен күрессе, қазір құрылған орталық барлық жалпыға ортақ жолдарды, соның ішінде жергілікті жолдарды тұтас қамтиды.

Біз дәл қазір өз іс-қимылымызды бүгінгі күн талабына сай ұйымдастырып, әлемдік деңгейде қалыптасқан стандарттарды жұмы­сымызға кеңінен енгізудеміз. Эконо­мика­мыздың кейбір саласындай, автомобиль жолдары саласында да білікті маман жетіс­пеушілігі – өткір мәселе. Біздің Орталық был­тырдан бері оқушылар арасында кәсіби бағдарлау жұмыстарын жүргізе бастады, оның барысында біз жол жөндеуші мамандығы туралы, осы кәсіптің артықшылықтары мен келешегі туралы әңгімелейміз.

Осылайша, біз шарамыз барысында мейлінше көп білім ордаларын қамту мақ­сатымен «1 000 мектеп» акциясын жүзеге асырдық. Тіпті, төтенше жағдай режимінде де тоқтап қалмастан, өз акциямызды ZOOM және Instagram тұғырнамасында, онлайн негізде одан әрі жалғастырдық.

Бұдан басқа, болашақ автожол саласы мамандарын дайындайтын, еліміздің кол­ледждерімен және ЖОО-лармен белсенді жұмыс жүргізудеміз. Атап айтқанда, біздің мамандарымыз осы аралықта 715 мектепте, 12 ЖОО-да, 17 колледжде кәсіби бағдарлау жұмыстарын жүргізген. Бұл бағыттағы шараларымыз одан әрі жалғасын табады.

Бұдан басқа, біз студенттерге ақы тө­ленетін практикадан өтуіне мүмкіндік жа­садық. Сөйтіп, өздерінің жазғы кани­кулында біздің Орталықта 45 студент атқарған еңбектеріне қарай ақысын алып, теориялық білімдерін нақты жұмыспен ұштастырып, тәжірибеден өтті.

Мемлекет басшысы Қасым-Жомарт Тоқаевтың 1 қыркүйекте жариялаған халыққа Жолдауында: «…ХХІ ғасырдың ұрпағы терең білімді болғаны жөн. Жас буынды ерінбей еңбек етуге бейімдеу қажет. Кез келген істі кәсіби дағды арқылы жүзеге асырған дұрыс» деген сөздері алға дамуымыздың жаңа дең­гейде өрлеуіне бағыт-бағдар сілтеп отыр. Орталығымыздың осы тұғырнаманы өзінің күнделікті іс-қимылында, жоғарыда айт­қанымдай, қатаң басшылықта атқарып жат­қанын атап айтқым келеді.

Мәселен, біздің кәсіби бағдар беру ба­ғытындағы шараларымыз барысында елі­міздің барлық өңірінде де талай талантты жасөспірімдер барын, олардың нақты біздің саламызға жұмысқа келіп, еліміздің келешегін өз қолдарымен байыпты өркендетуге атса­лысқысы келетінін көріп, қуанып қалдық.

Бір ғана мысал, Ақтөбедегі Мұхтар Арын атындағы мектептің 11-сыныбында Исламбек Берікұлы деген оқушымен жолықтық. Өзі жол саласының маманы болуы армандайды екен. Ол «1 000 мектеп» науқаны аясында кездесуге барғанда, бір қарағанда қазіргі жастарды өзіне онша тарта қоймайтын кәсіпке кәдімгідей қызығушылық танытып, елдегі жолдың жайы туралы мазмұнды әңгіме айтқанда, бізді тәнті қылды. Өзі озат оқушы. Орталық филиалының жұмысымен етене таныс, мамандарымызбен саладағы проб­лемаларды шешудің жаңашыл жолдарын бөлісуден де жалықпайды.

Тағы бір жас та болса, үлгілі ісімен танылып жүрген өнегелі өрендердің бірі – Л.Гончаров атындағы Қазақ автомобиль-жол академиясының 3-курс студенті Ерқанат Түймебай. Ол қазір «Жол активтерінің ұлттық сапа орталығы» РМК Алматы қалалық филиалында іс-тәжірибеден өтіп жатыр. Оқуда озат тәлімгер бізде тек тәжірибе жинап қоймай, орталықтың барлық қоғамдық жұмысына да белсене атсалысып, қыруар іс тындырып жүр.

Қазіргідей ақпараттық технологиялар мен жаппай цифрландыру заманында жастарға жүктелер жауапкершілік те зор. Біз өз жұмы­сымызда осыны басты назарға алуы­мыздың сыры да осында жатса керек. Біздің жағ­дайымызда бұл бағытта жаңа техноло­гиялар жолдың сапасын жақсартуға, оның жағдайын бақылауға, өзгерістерді көруге, трафик ағы­нын басқаруға, сонымен қатар талдау жасауға мүмкіндік береді.

Қазақта өткен ғасырдың басында мем­лекеттігімізді қалыптастырып, ұлты­мыз­ды жарқын болашаққа үндеген зиялылары арасындағы бірегей тұлға – Мағжан Жұма­баевтың «Мен жастарға сенемін!» деген өсиеті бүгін де маңызын жойған жоқ. Шын мәнінде, жастар – еліміздің болашағы. Мен осы «Жол активтерінің ұлттық сапа орталығы» РМК басшылығындағы жұмысым барысында көңілге түйген маңызды мәселенің бірі де нақ осы – білім мен біліктілікті, тиянақты жұмыс пен сапалы еңбекті ұтымды ұштастыру. Жолдың сапалы салынуы, мұқият және стандарттарға сай жөндеуден өткізілуі, түптің түбінде адам өмірін, әсіресе сәбилердің, мектеп оқушыларының өмірлерін сақтап қалуға әкелетінін естен шығармау қажет. Мұның бәрі халықаралық деңгейде қабыл­данған биік талаптар, ал оларды мүлтіксіз орындау – тек жолаушылар парызы ғана емес, сол жолды пайдаланатын автомобиль жүр­гізушілері мен жаяу жүргіншілердің де міндеті.

      Дереккөзі: Aikyn.kz