«Нұр-Сұлтан – Петропавл - Қорған» тасжолын қайта жаңарту жұмыстары аяқталуға жақын

Солтүстік Қазақстан облысында республикалық маңызы бар «Нұр-Сұлтан – Петропавл – Қорған» тасжолының ұзындығы 60 шақырымды құрайтын учаскесін қайта жаңарту жұмыстары жалғасып жатыр.

Жоба 2017 жылы іске асырыла бастады. Бүгінгі таңда жолдың 34 шақырымында жол жабындысының төменгі және жоғарғы қабаттары төселді. Нақтырақ айтқанда, жұмыстар жолдың 525-ші және 496-шы шақырымының, 496-шы және 465-ші шақырымы аралығында аяқталды. Бұдан бөлек, 22 су өткізу құбыры, 4 көпір және малөткелдері орнатылды.

Жобаның бас мердігері – «К-Дорстрой» АҚ. Авторлық қадағалауды «КазДорПроект» компаниясы жүзеге асырады. Қайта жаңарту жұмыстарына 450 жұмысшы, техниканың 275 бірлігі жұмылдырылған. Жұмыстар аяқталған соң тасжол 1б және 2 техникалық санаттарына сай болмақ. Жол учаскесіндегі қозғалыс осы жылдың соңына дейін ашылады деп жоспарлануда.

Еске сала кетейік, Солтүстік Қазақстан облысындағы республикалық маңызы бар жолдардың жалпы ұзындығы бүгінгі таңда 1968 шақырымды құрайды. Оның 87 % жақсы және қанағаттандырарлық жағдайда.