Қала әкімінің сенімі бізге артылған жауапкершілік!

Ұлттық мекеменің басты міндеті жолдардың сапалы салынуы! Дейтұрғанымен, осы кезге дейін жол құрылысын бақылау барысында арнайы жылжымалы зертхананың көмегімен анықталған кемшіліктер аз емес.

Кездесуде өрескел олқылықтармен салынған көшелердің тізімі шаһар басшысына ұсынылды. Нұрлыбек Мәшбекұлы өз ісіне немқұрайлы қараған мердігерлер жолдың кем-кетігін түземейінше, мемлекеттен бір тиын да қаржы алмайтынын кесіп айтты! Биыл шаһар аумағында түрлі деңгейде жөндеуден өтіп жатқан 200 көшенің құрылысын салаға жауапты мекеме мен ұлттық сапа орталығы бірлесіп, қатаң қадағалау жүргізуді тапсырды. Және де жолдардың сапасы тікелей қала әкімінің бақылауында болмақ!

Қабылдау соңында шаһар басшысы Нұрлыбек Нәлібаев Жол активтері ұлттық сапа орталығы мамандарының қырағы жұмысына оң бағасын беріп, ел игілігі үшін еңбек ететін ұжым қызметкерлеріне сенім артатынын жеткізді! Және құрылысшылар мерекесіне орай филиал директоры Жасұлан Керімқұловқа қала әкімінің Алғыс хатын табыстады. Бұл жаздың аптап ыстығына қарамастан жолдардың сапасына тексеру жүргізген мамандардың есіл еңбегіне деген құрмет деп білеміз! Осылайша, шаһар басшысының сенімі мен қолдауы сапа орталығы қызметкерлеріне тың серпін беріп, алдағы уақытта біздің мамандарға артылар жауапкершілік жүгі еселене түспек!